Nunga godang angka buku na hombar tu ulaon adat-paradaton dipatupa angka dongan, asa si hamauliatehononhon do i tu nasida. Alana, gabe sada panduan manang pedoman do i molo mangulahon adat-paradat-on di hita halak Batak. Nian tangkas do taboto molo adat-paradaton i, so-ngon hukum adat na adong di negaranta on do i, tradisi manang kebia-saan-kebiasaan na sai tong-tong diulahon di sada-sada luat manang tempat songon di hita na sian halak Batak.

Molo taida angka ulaon adat-paradaton na masa di tingki on nunga godang i na muba, godang angka modifikasi di rumang dohot ruhutna. Alana memang termasuk dinamis jala fleksibel do sifat ni adat-paradaton i, asalma nian unang manimbil sian makna dohot tujuanna. Laos ala ni i do ra adong hata ni ende manang hata ni natua-tua na mandok:

Nunga mumpat angka taruntuk, nunga sega gadu-gadu
Nunga muba uhum naburuk, nunga ro be uhum nabaru

Eme na masak digagat ursa,
ima na masa ima taula.


Pandohonan i adong do sintongna jala tarida do i di ulaon adat paradaton na masa di tingki on, lumobi ma di hita na adong di tano parserahan on, Jakarta dohot nahumaliangna.

Hombar tusi do pinatupa buku nametmet on songon manambai angka naung taboto, manang songon pedoman jala penuntun di rumang ulaon dohot ruhut-ruhut ni paradaton Batak Toba na somal taulahon, i ma di ulaon las ni roha songon i di ulaon arsak ni roha.

Molo hubahen hami pe judul ni tulisan on Pangantusion dohot Rumang ni Ulaon Paradaton, asa ummura didok roha antusan lapatan ni angka ulaon adat paradadaton i hombar tu bentuk ni ulaon, ima sian proses ni ulaon sahata tu pangujungina, dohot teknis manang strategi pelaksanaanna. Didok roha nian asa sude hita halak Batak mangantusi rumang dohot ruhut ni angka ulaon adat paradaton i. Jadi molo masa di nasida angka ulaon adat asa unang gabe adong be nian nabingung, jala asa unang sai targantung manang mangharaphon angka parhata (parsinabung) namangantusi di angka rumang dohot ruhut ni ulaon.

Molo tung pe so apala malo hita manghatai manang pasahathon angka na di rohanta sesuai tu rumang dohot ruhut-ruhut ni sada-sada ulaon, alai boi ma nian antusanta hira songon dia do makna, tujuan, dohot ruhut ni angka ulaon adat paradaton i. Alana ndang sai sude boi sian hita naboi jala malo manghatai, lumobi di jolo ni angka natorop.
Nanaeng dohonon muse, ia ulaon adat-paradaton i maol-mura do ulahononhon, molo so adong hian dope nilehon roha mangihuthon dohot mangulahonsa. Malahan tahe, adong do sian angka donganta nagabe pusing jala hampir stres molo masa ulaon adat di nasida. Misalna, molo naeng pamuli boru manang pangolihon anak. Hape nian sian segi materi (uang) cukup mampu do nasida.

Hombar tu si, asa ummura antusanta dohot ulahononta ulaon adat paradaton i, naumporlu botoonta parjolo ima prinsip manang falsafah napinungka ni ompunta naparjolo, i ma nanirahut ni DALIHAN NA TOLU.

Prinsip dohot makna na adong di Dalihan Natolu i mansai bidang do panghorhonna di tingki mangulahon ulaon adat, di ulaon las ni roha manang songon i nang di ulaon arsak ni roha. Pintor neang do panghilalaanta molo taantusi jala taulahon prinsip Dalihan Natolu i, ima:

  1. Manat hita mardongan tubu,
  2. Elek hita marboru,
  3. Somba marhula-hula.

Di tingki mangulahon adat paradaton i ingkon mardalan secara seimbang do prinsip natolu on, unang adong nian natelpang. Alana, songon tataring najolo do i tolu patna. Molo adong sada pe pat ni tataring i sega manang ruhet-ruhet (isarana di tingki na mangalompa tes manang indahan) pintor lomos do roha sotung use manang tungging annon angka nanilompa di tataring i.

Adong dope nian nahurang saotik sian prinsip Dalihan Natolu i, jala ala ni i do asa adong pandohan ni ompunta naparjolo, i ma Dalihan Natolu Paopat Sihal-sihal. Sahal-sahal sada tudosan ma i taringot tu dongan sahuta, pariban. Jala laos mardomu ma i tu pandohan na mandok: Jonok partubu, jonohan parhundul. Alai ianggo apala kunci keberhasilan manang hasintongan ni na mangulahon adat di hita Batak Toba, saguru tu prinsip Dalihan Natolu i do.

Tung mansai godang jala balga do lapatan dohot nilai-nilai ni Dalihan Natolu di ulaon paradaton. Jadi molo adong nahurang manang natimpang di pangulahonna di si, pintor so denggan be idaon ulaon i. Mardomu tusi pinatorang ma secara ringkas lapatan dohot makna ni Dalihan Natolu i, songon ma:

  • Manat Mardongan Tubu.

Molo didok manat mardongan tubu –i ma angka namarhaha-maranggi, parsabutuhaon manang parmargaon—na marlapatan do i na ingkon marsipasangapan, ingkon manat do hita mardongan tubu, molo naeng sangap hita. Ala ni i, sai dao ma sian hita pangalaho naleas mardongan tubu, lumobi di hita pomparan ni ompunta Simanjuntak Sotolu Sada Ina, terikat dope hita tu angka rumang ni adat-paradaton jala nahombar tu ruhut ni tarombo partubu (sundut) sian ompunta, asa songon tampulo aek do di na mardongan tub, jala tapasiding pandohan na mandok mardomu di tano rara.

  • Elek Marboru

Molo didok elek marboru, i ma naingkon marpanganju, berlapang dada tu angka pamoruon, molo tung adong pe nahurang-lobi di angka parsaoran siganup ari. Bungkulan do boru, ima silehon gogo pangurupion, pardemean-pardomuan.

Didok natua-tua:
Durung do boru, tumburon hula-hula
Sipanumpahi do boru di angka ulaon ni hula-hula
Unduk marmeme anak, unduk marmeme boru
Dos do holong ni roha di anak, songon i nang holong ni roha di boru.

  • Somba Marhula-hula

Hula-hula, ima silehon angka pasu-pasu, gariada tahe pola didok, hula-hula i gabe songon mata ni ari binsar dohot debata na tarida. Lapatan ni debata di si ndang Tuhan Debata, alai songon pandangan ni halak Batak do i patuduhon sangap ni hula-hulana.

  • Hula-hula di son i ma horong ni:
  • Tunggane (lae)
  • Simatua
  • Samarga ni simatua
  • Tulang (iboto ni inang)
  • Bona tulang/bona hula (tulang ni among)
  • Tulang rorobot (tulang ni pardijabu)
  • Bona ni ari (tulang ni ompung)
  • Hula-hula ni na marhaha-maranggi (abang-adik)
  • Hula-hula ni anak manjae (anak kandung)

Angka i ma horong ni hula-hula silehon angka pasu-pasu tu boruna. Laos taingot ma muse hata ni natua-tua na mandok:

Obuk do jambulan, na nidandan bahen samara
Pasu-pasu na mardongan tangiang sian hula-hula,
marsundut-sundut soada mara

Ni durung situma laos dapot pora-pora
Pasu-pasu namardongan tangiang sian hula-hula,
napogos hian boi gabe mamora.
Sambil na dapotan, sambil na tinaon ni pangula
Halak na burju marhula-hula ingkon dapotan pansamotan.

Jadi hadengganon ni sada ulaon tung saguru tu na mangulahon ruhut-ruhut ni Dalihan Natolu do i. Jadi, molo denggan mardalan i di angka parsaoranta, pintor neang do nang panghilaan di tingki na mangadopi manang mengulahan ulaon paradaton.

Asa mulak ma hita muse tu angka rumang dohot ruhut ni ulaon adat paradaton i. Di angka natua-tua asa talehon ma roha dohot tingkinta marsiajar marhite-hite haradeon mangadopi manang ro tu angka ulaoan ni angka tutur. Taida, taparate-atehon, jala tatangihon angka naniulahon di si. Unang ma nian manigor mulak sian ulaon, manang lalap hita holan namanghatai dohot angka dongan.

Godang dope nian angka sitaringotan di angka ruhut-ruhut ni ulaon i. Sada nari muse porlu do botoonta i ma peranan ni Raja Hata (Parsinabul) di ulaon i, baik sian pihak parboru manang sian pihak paranak. Somalna, molo di hita Batak Toba, peranan ni parsinabul tung mansai porlu do di angka ulaon, termasuk do i di ulaon arsak ni roha. Boi do tarida uli jala denggan angka ulaon dohot panghataion molo mampu parsinabul mambahen angka si las ni roha dohot dame marhite-hite hata pangidoan dohot elek-elek. Suang songon i do tu partingkian, boi do gabe sederhana manang marganjang-ganjang angka ulaon.

Songon sada contoh, olo na ma di sada ulaon pamuli boru manang pangolihon anak, sipata gabe hira sandiwara nama angka nanidok di pangkataion di ulaon i. Alana, hira sude ruhut ni ulaon dohot siulahonon nunga hira disepakati sian dos ni roha ni nadua pihak hasuhuton. Jadi sipata lucu manang erget do di roha, songon napausa-usa botohon na ma na nidok na i. Alai, manang beha pe i, peranan ni parsinabul tong do mansai porlu. Sahalak parsinabul ingkon parlambas roha do, jala unang be manghar-hari angka naung pinudun ni hasuhuton. Jala prinsipna, gabe termasuk suhut do parsinabul di ulaon i, beha mambahen sonang jala las roha ni hasuhuton alai ndang mangorui makna ni ulaon i.

Molo dung hira singkop jala hantus pangantusionta di prinsip dasar Dalihan Natolu i, molo ro tingkina hita mangulahon adat, pos ma rohanta gabe denggan jala uli ma i mardalan muse, lumobi molo di bagasan tangiang hita tu Tuhanta.

***