Ulos Mula Gabe (Ulos Tondi)

Pasahathon ulos mula gabe (ulos tondi didok najolo) termasuk do on ulaon adat-paradaton. Ulos mula gabe i ma na pinasahat ni parboru tu boruna molo dung denggan pamatangna hira-hira 5-7 bulan haroan, didok manggora pamuro di tingki i. Alai, somalna, holan tu boru na mangharoani anak buha baju (anak pertama) do i dipasahat. Molo tu na paduahon dohot satorusna, ndang pola dipatupa be i. Nian ianggo ditingki on ndang apala sude be mangulahon si songon on, hombar ma i ra tu angka partingkian dohot sibahenon.

Di naung jumpang tingkina haroan (denggan pamatang) ni boru muli, las ma antong roha nasida. Diboto natua-tua ni parboru ma i, jala pintor tubu tu roha dohot pingkiranna laho pasahathon ulos mula gabe tu boruna i. Dititi ma ari jala dipaboa ma tu haha-anggina dohot boruna (angka na santampuk dope) asa rap nasida manda-pothon boruna i, la-ho mangalehon upa-upa horas di badan ni boruna marhite-hite na pasa-hathon ulos mula gabe.

Sian horong ni helana pe (paranak) nunga rade laho manjalo hula-hulana (somalna, jolo dipaboa hula-hula i do na naeng ro nasida pasa-hat ulos mula gabe i. Dipatupa nasida do sipanganon na marsaudara, jala laos diparade paranak ma pasituak na tonggi ni hula-hulana. Jadi tangkas do mardalan adat-paradaton di son. Ianggo balga dohot rumang ni ulaon i, saguru tu dos ni roha do i.

Taringot tu teknis pelaksanaan dohot ruhut ni angka panghataion di ulaon pasahat ulos mula gabe, hira songon on ma na somal jala naung sering taulahon.

1. Andorang so dimulai marsipanganon, parjolo ma nian Parboru pa-sahathon upa-upa horas tu boruna, i ma na pasahathon ulos mula gabe, ala hira ulaon khusus (hahomion) do on. Jala hira dua tempat ma inganan ni dekke. Sada ma i tangkas dibahen di ginjang ni pinggan pasu marisi sada dekke dohot indahanna, jala sada inganan sipasahatonna tu paranak (3-5 dekke).

2. Pintor pihak paranak jumolo pasahathon tudu-tudu ni sipanganon tu hula-hulana, di siala las ni roha nasida ala nunga dioloi jala dita-ngihon Debata angka tangiang nasida, i ma di naung hatop haroan si boru muli i, hatop marurat tu toru.

Dia na parjolo sian versi nadua on asa tong-tong ma i saguru tu dos ni roha. Alai, molo na dumenggan hira parjolo ma nian pasahathon upa-upa marhite ulos mula gabe.

Hata pandohan manang hata ni napasahathon ulos mula gabe, hira-hira songon ma:

Inang ni boru:

Dipeakhon ma pinggan pasu namarisi dekke dohot indahan di jolo ni hela dohot boruna, didokma hatana:

“On ma di ho inang, borungku dohot di hamu helangku sipanganon songon upa-upa di badanmu, upa-upa gabe jala horas hamu di na managam haroan na naeng sipasahaton ni Tuhanta tu hamu, di na managam tubuan anak manang boru, asa margogo ho inang”. (disulanghon ma indahan tu boruna i)

Digotil jala disulanghon ma muse dekke, laos didok:

“Dekke sitio-tio do on, dekke si mudur-udur, dekke sahat. Asa tio ma angka ngolu-ngolu, udur satahi saoloan hamu dohot helangku. Sahat ma nauli nadenggan di ngolumu di tumpak asi dohot holong nasian Tuhanta i. (disulanghon tolu hali)

Amang ni Boru:

“Nuaeng pe di ho Borungku dohot Helangku. Hupasahatma ulos ragi hidup naung nirasian tu hamu, anggiat ma sarasi badan dohot tondimu tongtong di namanagam haroan, managam pasu-pasu sipasahaton ni Tuhanta di keluargamuna. Siboan gabe, si boan rongkap maduma ma di hamu mamangke ulos ragi hidup on. Mangulosi anak dohot boru tu joloan on di ho inang, boru hasian, songon i di helangku. Asa songon hata ni umpasa ma dohononhu:

Sai jongkal urat ni ri, tu jongkal urat ni singkoru

Ulos mula gabe naung hupasahat i,

sai saur ma i di hamu, mangulosi anak dohot boru.

Tubu ma lata di toru ni bunga-bunga,

Sai tubu ma di hamu anak namarsangap dohot angka boru namartua.

Sahat-sahat ni solu sahat tu Tigaras,

Sahat leleng hamu mangolu, gabe jala horas.

Molo dung mardalan ulaon i, boi ma ditorushon tu ulaon na mangihut, i ma paranak pasahathon tudu-tudu ni sipanganon tu hula-hulana, songon i muse parboru pasahathon dekke tu pamoruonna.

Catatan:

Taringot di parjambaron juhut di ulaon songon on, molo tung pe didok paranak songon surung-surung ni parboru. Alai tangkas botoonta, ala parboru do naro mandapothon pamoruonna, dumenggan ma molo didok parboru: “Nauli ma i Raja ni Boru, alai ala tangkas do huida hami hamu di son angka namarhaha-anggi, boru, bere, dohot dongan sahutamu. Ba atur hamu ma disi, asa sidapot solup ma hami.

Hata dohot pambahenan ni parboru si songon i, i ma napatuduhon porlu ni masipasangapan angka namartutur. Unang ala ni nasaotik, gabe adong natarsinggung, lumobi di parjambaron juhut. Songon hata namandok, jolo diseat hata asa diseat raut.

Panghataion muse dung marsipanganon, pasahathon hata si gabe-gabe ma parboru. Dung i, mangampu ma sian horong ni paranak. Alai andorang so mangampu manang so marhata sigabe-gabe dope, pintor hira adong do pangidoan sian paranak, asa jolo ro nasida laho mangalusi ulos, pasahathon pasituak natonggi ni pihak parboru.

Angka nauli nadenggan ma i saluhutna, molo sian dos ni roha. Gabe ma jala horas.

NB. Adong deba versi namasa diulaon sisongon on, ima naro boru (paranak) mangalap ulos mula gabe tu huta (bagas) ni amangna (hula-hula). Alai, molo di ruhut ni ulaon dohot angka pangha-taion, hira-hira dos do i songon naung pinatorang.

Hasosorang Anak Buhabaju

Sorang ma si Ucok manang si Butet, ima anak buhabaju (anak pertama) di keluarga na imbaru i. Sude do marlas ni roha, sian pihak paranak songon i nang sian parboru. Alai, songon naung nidok hian, ndang apala piga be saonari namangulahon sude angka ruhut-ruhut paradaton i di tingki on.

Di las ni roha nasida, dipaboa ma tu angka tuturna nang dohot tu hula-hulana. Jala molo najolo, nang nuaeng pe tahe, di piga-piga daerah, dipamasa dope maranggap (melek-melehan) i ma sian mulai ari par-sorang ni dakdanak i sahat na mapipil pusokna manang hira-hira pitu ari lelengna.

Dipatupa paranak do mangharoani manang didok suang robo-robo-anna. Dipatupa sipanganon, angka bangun-bangun sipanganon ni angka tutur, termasuk dongan sahuta. Alai ndang apala pinahan dipatupa disi, jala angka tutur na ro diboan do angka boan-boan hombar tu ruhut paradaton. Adong do namamboan boras, kado, hepeng, nang angka na asing dope.

Na masa muse taida jala nunga taulahon hombar tu na sorang anak buhabaju, i ma di naro hula-hula manang tulang ni dakdanak i pasahat-hon aek ni unte. Mardalan ma di son ulaon adat-paradaton. Diboan hula-hula ma ulos parompa ni pahompuna/ bere dohot dekke sipasahatonna tu paranak. Songon i do nang paranak dibahen jala dipa-tupa do sipanganon namarsaudara. Jadi mardalan do di ulaon on hata na masisisean, hata na marsigabe-gabe. Songon i nang paranak, pasa-hatonna do pasituak natonggi tu hula-hulana. Nauli do tutu angka si songon on, asalma sian sada ni roha dohot dos ni roha. Gabe ma jala horas.

Paebathon Anak Buhabaju

Paebathon anak buhabaju lapatanna mamboan anak buhabaju i tu huta (jabu) ni ompungna dung marumur hira-hira 2-3 bulan. Nian ndang apala sude be mangulahon si songon on di bagasan adat-paradat-on.
Di ari naung ditontuhon diudurhon paranak ma anakna dohot paru-maenna mamboan pahompuna i tu jabu ni hula-hulana. Udur nasida rap dohot haha-anggina, boru, bere nasolhot. Diboan nasida ma sipa-nganon na marsaudara dohot angka sipanganon na asing na mambahen las roha ni hula-hulana. Parboru pe diparade do dekke dohot ulos nalaho sipasahatonna tu pamoruonna i, songon i molo adong angka ulos sian horong ni parboru.

Molo najolo di napaebathon anak buhabaju tu ompungna, laos dipangido hela i do tu simatuana songon indahan arian ni pahompu i, manang didok andor ansimun, boi do i horbo, hoda, manang hauma. Alai di tingki on ndang pola masa be si songon i. Alana, biasana, didok (biaya) indahan arian manang andor ansimun i nunga dipakke laho pasingkolahon boru na i (inang ni dakdanak i). Jadi hira so adong be di tingki on na mangido si songon i.

Partording ni ulaon di na paebathon anak buha baju, hira songon ma:

Dung pungu jala hundul angka tutur, ro ma hata boa-boa sian par-anak di na laho pasahat tudu-tudu ni sipanganon. Somalna, amang-ni-hela manang haha-anggina do manghatahon, songon ma didok:

“Di hamu hula-hulanami, marnatampak do hami di son laho pasahathon tudu-tudu ni sipanganon namarsaudara, tudu-tudu ni panggabean parhorasan do on Rajanami, di naung las rohanami dohot rohamu, naung dapot hami songon hata ni natua-tua, dapot najinalahan jumpang naniluluan di tumpak asi dohot holong ni Tuhanta i.

“Molo tung songon on pe na boi hupasahat hami di tingki on, las ma rohamu. Botima!”

Dipasahat parboru ma dekke tu paranak songon nasomal, jala hatana pe hira dos do i tu angka ulaon na asing.

Dung i mangido panuturion ma paranak, didok: “Di hamu hula-hulanami, ala naeng sulangan ni helamu ma Raja i, beha Rajanami, asa tuturi hamu hami.

Didok Parboru mangalusi: “Nauli ma i tutu. Alai jolo marsipangan-on ma hita, jala laos sian hamu ma namanguluhon tangiang.

Di tingki na marsipanganon i dope, pintor borhat ma ama dohot ina ni dakdanak i mamboan anak buhabajuna i, dipaabinghon ma tu om-pungna boru dohot ompung na baoa. Didok: “Ampu hamu ma amang-inang pahompumuna on. Dungi disulangi helana ma simatuana dohot indahan na las dohot lompan naung diparade hian. Parjolo ma sian simatuana boru, baru pe tu simatuana doli.

Angka engkel dohot las ni roha do tarida di ulaon si songon i. Songon hata pasu-pasu sian ompungna tu pahompuna, didok asa imbur-imbur magodang jala siboan sangap pahompuna i muse.

Dung disulangi simatuana i, boi do muse disulangi hela dohot boru i angka horong ni hula-hulana na ro di ulaon i. Sipata gabe simatuana do langsung manggorahon angka sijalo sulang-sulang i. Di tingki na manu-langhon hela dohot boru i, sai di bagasan las ni roha do nasida, minar bohina jala didok ma hatana, “On ma inang, amang, lae, inang bao sulang-sulang natabo di hamu. Halashon hamu ma on, asa manumpak ma tondimuna di hami borumu.

Dung sidung marsipanganon, mulak ma muse tu namasisisean (ma-nungkun). Disungkun dongan tubu ni parboru tu suhutna taringot tu ulaon i. Alai boi do langsung nasida manungkun pamoruon na ro mandapothon nasida i. Somalna, jolo pasahathon ulos holong (parom-pa) do ompungna tu dakdanak buhabaju i, dungi marhata sigabe-gabe ma sian hula-hula, jala mangampu ma muse paranak.

Songon i ma hira ruhut ni ulaon napaebathon anak buhabaju pinatu-pa di son, songon acuan singkat di hita. Godang dope nian angka pan-dohan di ulaon i na naso pola nisurathon di son. Alai unang ma nian pola marganjang-ganjang angka panghataion di ulaon i, unang gabe membosankan. Naporlu di si makna dohot ruhut ni ulaon i do asa hombar tu maksud ni ulaon i. Gabe ma jala horas.

NB: Andorang so mangampu, denggan do molo jolo dipasahat paranak pasituak na tonggi ni sude horong di hula-hulana. Taringot tu parjambaron, hira surung-surung ni parboru do i.

Tardidi Anak

Molo tardidi anak, lumobi ma i buha baju, olo do dibahen sada pesta partangiangan jala diundang angka tutur sahat tu dalihan natolu. Di son pinatorangon do rumang dohot ruhut ni ulaon i, asa uli nian pardalanna.

Molo sahat tu gokhon dohot jou-jou tu dalihan na tolu, tardok ma ulaon i nunga ulaon na balga. Jadi tudu-tudu ni sipanganon pe di si ingkon lengkap ma dipatupa (lengkap dohot somba-somba).

Molo didok sahat tu dalihan natolu, lapatanna dohot do diundang tulang ni amanta i dohot tulang ni inanta i (tulang rorobot). Molo anak buha baju do natardidi i, nunga masa muse niida nuaeng, gabe dibahen maralaman manang di gedung pertemuan manang di hotel. Alai molo tung di jabu pe dibahen ulaon i na denggan ma i. Na porlu muse si pingkiran di na patupahon ulaon tardidi anak i ma taringot di parting-kian. Molo tangkas do binoto pukul piga sae acara pandidion di gareja, boi ma tontuhononhon tu angka tutur pukul piga nasida ro tu ulaon i. Lapatanna, asa unang ro angka tondong tu jabu manang gedung pertemuan i hape suhut ndang ro dope sian gareja.

Nian nunga somal taadopi ulaon si songon on. Mardomu tu si binahen di son muse songon pedoman (acuan) di hita.
Dung pungu jala hundul sude angka tutur, dipasahat suhut ma tudu-tudu ni sipanganon namarsaudara tu hula-hulana. Biasana jolo digora-hon mamang disungkun nasida do horong ni hula-hulana i manang naung rade nasida jala tu jolo ni ise ma dipasahat.

Hata ni napasahathon tudu-tudu ni si panganon songon on ma:

“Di hamu hula-hulanami, di son hupasahat hami tu hamu tudu-tudu ni sipanganon di pesta ni si Ucok (Butet) pahompu-mu, songon dalan pasangaphon hamu Rajanami. Molo tung songon on pe na boi hupasahat hami las ma rohamu. Botima!”

Hata ni napasahat dekke:

“Songon i ma di hamu pamoruonnami, lumobi di hela dohot borungku songon i di pahompu si Ucok. Di son hupasahat hami upa-upa dekke sitio-tio, asa sai tio ma antong panggabean parhorasan di hamu. Dekke simudur-udur ma on antong, asa sai mudur-udur hamu mangalului angka ngolu-ngolu siapari laho pature-ture pahompunami on. Dekke saur jala dekke sahat ma on, sai saur ma antong ibana laho jumunjung goarnai, imbur-imbur magodang sahat saur matua, tumpahon ni Tuhanta pardenggan basa i. Botima!

Molo tung adong dope sian horong ni Tulang nalaho pasahathon dekke laos mangihut ma i. Alai, sai jumolo do hula-hula. Songon i muse, molo dipangido hula-hula asa langsung dipasahat nasida ulos holong (parompa), i pe nauli do saluhutna i.

Dung sidung marsipanganon, dipungka ma manghatai, biasana sungkun-sungkun sian hula-hula taringot di tudu-tudu ni sipanganon.

Boi do jolo masipasangapan paranak dohot dongan tubuna. Molo dung dos rohana, ditontuhon ma sian namarhaha-anggi i gabe parhata (parsinabul) laho mangalusi angka sungkun-sungkun sian hula-hula dohot tulang. I do ulina molo denggan angka namardongan tubu, si sada ulaon di las ni roha nang di arsak ni roha.

Taringot tu parjambaron, sai jumolo do suhut (parsinabul ni par-anak) i parsangaphon hula-hulana didok, “Ba nunga hupasahat hami tu hamu Rajanami, hamu ma namangaturhon. Namangulahon ma hami.”

Molo songon i, pintor olo do sipata didok hula-hula manang tulang i songon on: “Sidapot solup ma hami. Diboto hami , diantusi hamu ruhut-ruhut ni parjambaron.”

Nauli jala nadenggan ma saluhutna i. Dipature ma jambar i jala dipasahat tu angka tutur: jambar ni hula-hula, tulang, pariban, songon i tu boru, dongan sahuta nang jambar ni dongan tubu.

Ulaon na mangihut muse i ma marhata sigabe-gabe sian angka ho-rong ni hula-hula dohot uduran nasida. Mangampu ma muse sian suhut (manang paranak), jala somalna andorang so marhata sigabe-gabe, dipa-ngido paranak do tingki asa dipasahat songon pasituak na tonggi tu hula-hulana dohot tulangna. Dioloi jala digabehon hula-hula dohot tulang ma i. Somalna hira sude do horong ni hula-hula dapotan, alai martingkat (gumodang tu nasumolhot) ma dibahen paranak balga ni hepeng pasituak natonggi i. I ma songon ganti ni dekke dohot ulos nabinahen nasida.

Dung sidung angka ulaon i, dipangido hasuhuton paranak ma asa hula-hula na manutup ulaon i, marhite ende dohot tangiang.

- Molo adong acara kebaktian, dipatupa ma i songon panimpuli ni ulaon i. Hombar tu si boi ma ra panghataion dipersingkat alai jelas sasaranna.

– Di tingki na naeng pasahat tudu-tudu ni sipanganon, denggan do parmisi dohot hata marsantabi paranak tu horong ni Tulangnya na mandok molo tung tu jolo ni hula-hulanami pe hupasahat hami tudu-tudu ni sipanganon i, asa marboha-bahenon nasida (mohon maaf dan maklum).

Mangompoi/Manuruk Jabu

Di tingki on nunga hira dipados halak be ulaon namangompoi jabu dohot manuruk jabu. Sasintongna asing do nian ruhut ni ulaon i. Umbalga do ulaon mangompoi sian manuruk jabu. Najolo, molo didok mangompoi jabu, boi do panjuhutina dibahen horbo, lombu, jala sogot manogot na i diseat do namarmiak-miak sipanganon ni angka tutur, lumobi sian hula-hula (songon sibuha-buhai di ulaon pesta unjuk).
Angka na porlu ulahononhon di ulaon namanuruk jabu. (Nian molo di angka ruhut ni panghataion hira dos do di na mangoppoi jabu dohot na manuruk jabu)

Sogot manogot i, di parnangkok ni mata ni ari, nunga mangarade paranak (suhut) paimahon hula-hula dohot horong ni tulang na. Nunga diparade nasida hian angka sipanganon tu ulaon i dohot sipanganon na marsaudara. Songon i sian horong ni hula-hula, nunga diparade nasida hian angka siboanonna tu jabu ni pamoruonna, ima dekke dohot indahan masak, dohot boras si pir ni tondi.

Dung jumpa tingkina, masuk ma hula-hula tu jabu ni boruna. Diba-hen hula-hula ma parbue na pir (boras) di simanjujung ni hela dohot boruna di pintu masuk.

Didokma:

“On ma upa-upa gabe, upa-upa horas. Pirma tondi muna jala horas-horas mangingani jabu sibaganding-tuamuna on. Hipas jala horas-horas ma hamu didongani asi hohot holong ni Tuhanta Debata.

Dung hundul angka tutur dohot sude sisolhot, dipasahat suhut ma tudu-tudu ni si panganon tu hula-hula. Alai dumenggan do molo jolo parmisi, marsantabi tu horong ni tulang ni suhut.

Hata ni napasahat tudu-tudu ni sipanganon:

“Di ari nauli di bulan nadenggan on, hupasahat hami tu hamu Rajanami tudu-tudu ni sipanganon namarsaudara, tubu-tubu ni panggabean parhorasan ma on, molo songon on pe na boi hupatupa hami laho pasangaphon hamu, las ma rohamu di si Rajanami. Jala songon hata ni natua-tua ma dohononnami:

Huta tanobato parasaran ni leang-leang,
Horas ma di hamu Rajanami di na manjalo,

Horas ma di hami borumu na mangalehon.

Botima. (Diolophon natorop)

Dung i dipasahat hula-hula ma muse dekke tu pamoruonna i. Songon on ma hata sidohonan ni hula-hula di napasahat dekke dohot ulos.

Tingki pasahat dekke:

“Di son hupasahat hami tu hamu dekke sitio-tio, sai tu tiona ma ngolu-ngolu di hamu. Dekke sahat, dekke na ganjang ma on, asa sahat ma angka nauli nadenggan jala ganjang ma umur-muna. Songon i dekke simudur-udur ma on, asa sai mudur-udur ma hamu tongtong rap tu dolok tu toruan mangalului angka naringkot i ditumpak asi dohot holong ni Tuhanta i.”

“Nuaeng pe hupasahat ma ulos na ganjang on. Parhitean ma on, sai dilehon Debata ma ganjang ni umur di hamu di na manuruk bagasmuna on. Hatubuan ni anak dohot boru ma jabu sibaganding tua on di hamu, lumobi gabe bagas pamujion di Tuhanta Pardenggan basa i.”

Asa songon hata ni umpasa ma tutu dohonon nami:
Andor ras ma tu andor ris, tubu di Dolok Purbatua,

Sai horas-horas ma hamu mangingani bagasmuna on,

ditumpak Tuhanta Pardenggan Basa i.

Tubu ma simarlasuma di Dolok ni Lobutua

Sai ganjang ma antong umurmu mangingani sibaganding tua on,

sahat hamu tu nasaur-matua.

Sahat-sahat ni solu sahat tu Tigaras,

Sahat leleng hamu mangolu, gabe jala horas. (Botima!)

Dung simpul napasahat ulos (termasuk molo tung adong sian horong ni angka tulang napasahat dekke dohot ulos) diparade ma sipanganon. Dung i sahat ma muse tu na marbagi jambar

NB: Molo boi nian, di na marbagi jambar di ulaon namanuruk jabu, unang morot jambar ihur-ihur sian hasuhuton.

Taringot parjambaron juhut, khususna jambar ihur-ihur, adong do deba namandok gabe ulak ni tandok ni hula-hula ma i. Alai adong naasing mandok, molo boi nian, unang ma morot i sian hasuhuton, alai boi ma i diganti osang dohot somba-somba. Alai jolo diseat hata asa diseat raut, ba pinangido angka panuturion di angka namarbagi jambar, asa unang adong namanarita. Asing dolok asing do duhutna, asing luat asing do nang ruhutna.

Adong do muse versi: sai parjolo hula-hula dohot horong ni tulang pasahathon dekke upa-upa dohot ulos tu suhut. Dung sae i pe suhut pasahathon tudu-tudu ni sipangaon tu hula-hulana. Aek godang ma tu aek laut, dos ni roha sibahen nasaut.

Ulaon na mangihut muse i ma angka panghataion. Molo tung boi sai jumolo ma sian dongan tubu ni hasuhuton manungkun sintuhu ni ulaon, sintuhu ni indahan masak tu hasuhuton. Nang pe songon i tong do hita kembali tu angka dos ni roha, dohot tu rumang ni ulaon i.
Hula-hula dohot tulang ma napasahathon hata pasu-pasu, hata si gabe-gabe, molo sian suhut paranak rap mangampu ma, songon i sian dongan sahuta. Alai porlu botoonta, molo masituak na tonggi asa tangkas do dipasahat tu sude hula-hula, tulang dohot uduran nasida.

Molo tung pe dipatupa partangiangan/kebaktian di ulaon na manuruk jabu, mansai nadenggan ma i tutu. Alai, hira panimpuli ma i diulaon i.